قصه بقلم سلوى ابراهيم

خضت في عرض بنت وإنت مرتاح بدون حتى تأنيب ضمير ودلوقتي تقدر تتفضل.
عدى تلات أيام ياسمين كل يوم فيهم تتحايل عليا أحضر المحاضرات وأنا أرفض الوضع صعب على بنت زيي موقف وحش! هدخل المدرج إزاي بعد اللى حصل ببقى مكسوفة وأنا بتخيل الناس بيبصولي ويقولوا هي دي اللي الدكتور قال عليها كذا.
تفتكري إيه ممكن يحصل يا ياسمين
تفتكري باباكي أستاذ ودكتور خالد هيسكت على اللي حصلك ده
بدلت الموبايل من إيدي اليمين لإيدي الشمال وحطيت السماعة على ودني
بس بابا ملوش دخل بعد كده هو اتحول للتحقيق.
أنا متأكدة إنه مش هيخرج من الموضوع بالسهولة دي.
نفخت بضيق مش عايزه محور حياتي يبقى الموضوع ده خلاص بقى هو كده كده هيتعاقب.
قوليلي يا ياسمين سجلتي المحاضرات وكتبتيها
أيوه بعتهملك كلهم واتساب.
قفلت الموبايل في نفس الوقت اللي بابا دخل فيه أوضتي.
عامله إيه يا حبيبتي!
الحمد لله يا بابا.
ماتغيبيش من الكلية تاني إنت أشرف وأنضف بنت في الدنيا ماتخليش كلام حد يأثر عليكي وصدقيني حقك هييجي
طب عرفت حاجة يا بابا
عرفت إنك مش أول بنت يقولها كده
اتعدلت في قعدتي وأنا ببصله بتركيز غمزلي بطرف عينه وهو بيبتسم..
هنزعله جدا عشان زعلك وعشان أثر على نفسيتك ونفسية بنات تانية غيرك.
عرفت بعدها إنه اتنقل من الجامعة كلها لجامعة تانية فى محافظة أبعد مع وقفه عن العمل لمدة سنة كعقاپ لاللي عمله معرفش ليه كان بيتصرف كده وبيقول الكلام ده بس اللي عرفته إن سبب فصله مش أنا ولكن الموضوع كان ممتد من قبل دخولي الجامعة أصلا وإني مش أول بنت يقولها حاجه زي دي بل في بنات اتقالها كلام أسوأ وشباب برضو وبناء عليه تم فصله من الجامعة لإنه اتسبب فى أذى نفسي لكتير من الطلبة.
هتنزلي الجامعة
غمزتله وأنا بلف ضهري
طالما زعلتوه أوي كده مفيش مشكلة.